TACLOBAN CITY– Padayon an ginhihimo nga assestment ngan monitoring hiton mga opisyal han Jipapad Eastern Samar, matungod ha epekto ni bagyong Tino ngan bagyong Uwan ha nasabi nga lugar.
Sumala kan Dr. Bejamin Ver, Municipal Mayor Jipapad Eastern Samar, ha pagkayana waray pa hira signal, ngan waray pa gihapon kababalik an suplay hiton kuryente ha iya mga nasaakupan.
Gintatalinguha naman han mga barangay opisyal han kada barangay nga makagsumiter hiton mga total damage nga ginbayaan han mga bagyo, agud nga matagan na an mga ine hin sakto ngan angay nga hinabang.
Dugang pa hine, nga nakaghipatik hira hin partially ngan totally damage nga mga panimalay, kalakip na an mga bag-o nga pananom nga nadarahigan matungod han pagbabaha.
Purluminos 300 nga pamilya an nagbakwit ha Jipapad Eastern Samar, kun diin ginbubug-os ine hiton 1 kayukot nga mga indibidwal, ngan ha pagkayana in nakapanguli na an mga ine ha ira tagsa-tagsa nga mga panimalay.
Ha pagkayana, uunahon nira adton mga residente nga duro nga naapektaran han naglabay nga mga bagyo, agud nga matagan an mga ine hin dayon nga bulig.
Gagamiton naman nira ha pandestribwer an ayuda nga naka pre-position na tikang ha Department of Social Welfare and Development (DSWD).
Waray naman may nahipatik nga nasamaran ngan namatay ha mao nga kalamidad.
Ha lain nga bahin, ginmalatumat naman hine kumo amay han Jipapad Eastern Samar, nga usa an iya nasasakupan nga magsusunod ha kamanduhan nga ginpalusad ni Pangulong Marcos Jr. an kasumpay hiton implementasyon han State of Calamity ha bug-os nga nasud.
