METRO MANILA – Ginduon ni Rep. Francisco Paolo Ortega V ha Kamara nga pumasar ha sufficiency in form ngan kinahanglan na nga umabanse ha sunod nga pitad an ika-upat nga impeachment complaint kontra kan Vice President Sara Duterte.
Ha pagdungog han House Committe on Justice nga ginmamanguloan ni Chairperson Jervil Luistro, pormal nga ginpresenta ni Ortega an gintatawag nga Cabrera complaint.
Kaupod hi Rep. Bienvenido Abante Jr., ginsumite nira an Resolution of Endorsement dida han Pebrero 18 ha atubangan ni Secretary General Atty. Cheloy Velicaria-Garafil.
Gintagan-duon ni Ortega nga an reklamo nga ginpasaka han mismo complainant nga hi Atty. Nathaniel Cabrera in duly verified ngan duly notarized.
Pasar ini ha Rules of Procedure in Impeachment Proceedings han komite mahitungod nga klaro nga an mga akusasyon in basar ha personal knowledge ngan authentic documents.
Sumala ha mambabalaud, panahon na agud manukot han may kabaraydan ha mga opisyal han gobyerno bisan ano man an ira kolor ha pulitika.
