NATIONAL–Gineksplikar han prosekusyon ha International Criminal Court (ICC) an ginaalegar nga papel han mga “co-perpetrators” ni anay Pangulong Rodrigo Duterte ha pagpapatuman han war on drugs tikang ha iya pamamangulo kumo alkalde han Davao City kutob han nagin Pangulo ine.
Sumala kan Prosecutor Robynne Croft, in mayada ginaalegar nga “hierarchical structure” nga ginbug-os ni Duterte kun diin an mga mando in nagtitikang ha iya paubos ha mga opisyal ngan myembro han Davao Death Squad (DDS), nga ha katapusan in ginpahaluag ha nasyunal nga lebel.
Pira ha mga kalakip ha mga ginmalatumat nga ginaalegar nga kakunstaba kay hira Ronald “Bato” dela Rosa anay chief han Davao City Police; Vicente Danao, anay ulo han Davao City Police; Camilo Cascolan (finance chief han Davao City Police); Christopher Lawrence “Bong” Go (special assistant); Dante Gierran (Davao Director han NBI); ngan Vitaliano Aguirre II kumo abogado ngan ha katapusan han nagin Pangulo na hi Duterte, in nagpabilin an mga myembro han gintawag han prosekuyson nga “common plan” kun diin gindugang kumo ginaalegar nga kakuntsaba hira Oscar Albayalde kumo anay regional director han NCRPO, ngan Isidro Lapeña kumo anay ulo han Philippine Drug Enforcement Agency (PDEA).
Ginmalatuamat gihapon an papel ni Dela Rosa nga nahisumat nga nagbug-os han mga “Tokhang” operations nga nagin ginaalegar nga modelo han mga operasyon ilarom han Oplan Double Barrel.
Sumala ha prosekusyon, basar ha usa nga insider witness, an pulong nga “neutralize” ha memorandum in gingamit agud nga igpahiwatig an mando nga magpatay.
Ginmalatumat gihapon han Prosecutor nga ginaalegar nga kontrolado han mga co-perpretrator an ehekutibo, pulisya, PDEA, National Bureau of Investigation, ngan Department of Justice nga nagresulta ha ginaalegar nga “climate of impunity”.
Samtang, nauna nga ginduon han depensa ha pangunguna han abogado ni Duterte nga hi Nicholas Kaufan nga inosente an anay president ngan an iya mga pahayag han una in retorika la, ngan mayada mga ginaalegar nga mando nga gumamit la hin pwersa para ha self-defense.
