Gin tudlok han International Criminal Court (ICC) hi Judge Joanna Korner kumo presiding judge han Trial Chamber III nga makapot ha kaso nga crimes against humanity kontra kan anay Presidente Rodrigo Duterte kasumpay han iya kampanya kontra ha ilegal nga droga.
Ha usa nga dokumento nga mayda petsa nga Abril 29, ginkumpirma han ICC Trial Chamber III nga hi Korner an napili nga magmamangulo ha tulo nga judges panel.
An desisyon in ginbuhat pira kaadlaw mahuman bug-usan han ICC Presidency an nasabi nga trial chamber dida han Abril 24.
Ang Trial Chamber III in ginbubug-os nira Korner, Judge Keebong Paek, ngan Judge Nicolas Guillou, ngan ini in pormal nga ginbug-os dida han Abril 24 han ICC Presidency agud dunggon an kaso kontra ha anay presidente.
Hi Judge Korner in usa nga beterano nga British judge nga mayda sobra 45 katuig nga eksperyensya ha pantag han crimina law, Nagtikang hiya ha ICC Trial Division dida han Marso 2021 ngan magpapabilin kutob 2030.
Ugsa bumulig ha ICC, nagserbi hiya kumo huwes ha Crown Court ha England ngan Wales, kun diin kumapot hiya hin mga kaso-kriminal sugad han murder ngan fraud. Nagin kaparte gihapon hiya han International Criminal Tribunal for the former Yugoslavia kumo senior prosecutor.
Dida han 2004, gintagan hiya hin Companion of the Order of St. Michael and St. George (CMG) kumo pagkilala ha iya serbisyo ha international law.
An pabug-os han Trial Chamber III ngan pagtudlok han presiding judge in iginkokonsidera nga importante nga pitad ha pag-abante han kaso kontra kan Duterte haha ilarom han ICC proceedings.
