TACLOBAN CITY – Posible nga magin pangunahon nga rason hiton paghitaas han inflation yana nga bulan hiton Marso an tigdaay nga pagsaka han presyo han lana.
Sumala kan Prof. Christopher Bacungan, usa nga ekonomista, mayda ‘economic consequence’ an nagpapadayon nga away han US-Israel ngan Iran kun diin usa na hini an nahitatabo yana nga tigdaay nga pagsaka han presyo han lana ha nasud.
Dugang pa hini, bisan man kun dire niya ginlalauman nga magigin sugad kalaksi an pagpatuman han umento ha mga presyo han lana, in ginpapamulat na ini nga mahitabo.
Ginmalatumat gihapon hini nga dire la an Pilipinas an apektado o maaapektaran han kasamok han tulo nga nasud, kundi an kadam-an han mga nasud ha kalibutan mahitungod nga damo nga nasud an natapod ha mga produkto nga lana, labi na an Pilipinas nga makusog ngan dako nga importer han lana.
Ginlalauman naman nga ha pagtikahuruman han syahan nga kwarter in malaksi gihapon an pag-umento han presyo han mga papliton.
