TACLOBAN CITY – Patay an usa nga high value target samtang samaran naman an live in partner hini ha nahitabo nga panmumusil ha Brgy. Naghalin, Kananga, Leyte.
Ginkilala an mga biktima nga hira Sonny Toms Cabahug, 35 taong gulang ngan an live in partner hini nga hi Erika Arcala, 19 anyos ngan parehos residente han Brgy. Monte Bello, Kananga.
Sumala kan PSMSgt. Aldwin Ala, duty investigator han Kananga Municipal Police Station, sakay ha ira motor an biktima ngan live in partner hini nga tiuli na ha ira panimalay han pagpamumusilon ini han waray pa kakilal-i nga suspek.
Nakapag-angkon hin igo hin bala ha ulo an biktima nga naging rason han dayon hini nga kamatayon samtang minor injury naman an naangkon ni Arcala nga ha pagkayana in aada na ha talwas nga kamutangan.
Nahibaruan nga an namatay nga biktima nga hi Cabahug in una na nga naaresto han tuig 2016 tungod ha kaso nga pagtalapas ha RA 9165 o an Comprehensive Dangerous Drugs Act of 2002.
Ha pagkayana in padayon an ginbubuhat nga imbestigasyon han mga otoridad agud nga maaresto an nagpapaluyo han mao nga insidente
