TACLOBAN CITY – Narekober han tropa hiton 87th Infantry Battalion an pira nga mga High-powered firearm, mahuman an natabo nga engkwentro kontra ha mga walhon nga grupo ha Barangay Mabuhay, Gandara, Samar.
Sumala kan Capt. Jefferson Mariano, Division Public Affairs Officer 8ID PA, nagdudumara an nasabi tropa han gobyerno hin
Focused Military Operations (FMO) han matabo an engkwentro.
Mahuman an lima ka-minutos nga nagin balyuan han buto hiton pusil ha magkaluyo nga kampo, dinhe narekober han mga kasundaluhan an usa nga Bushmaster rifle, duha nga M16 rifle magazines ngan backpack nga mayda sulod nga mga importante nga dokumento.
Waray naman may nahireport nga nasamaran o namatay ha kampo han kasundaluhan, sugadman gihapon ha walhon nga grupo.
Padayon naman an panawagan han tropa hiton gobyerno ha mga terorista nga grupo nga bumalik na ha gobyerno ngan ig-undang na an waray basihan nga paninindugan kontra ha kalugaringon tuna.
Dugang pa han mao nga opisyal, padayon an ginhihimo yana nga programa hiton gobyerno para ha mga surenderee nga CPP-NPA, agud nga makapag kinabuhi na an mga ine hin normal kaupod an ira mga tagsa-tagsa nga pamilya.
