TACLOBAN CITY – Andam na an Guiuan, Eastern Samar ha nakatalaan nga pagbisita ni Presidente Rodrigo Duterte nga asya an mangunguna ha pag-unveil han usa pa nga historical marker ha mao nga bungto kasumpay han Quincentennial Commemoration han Kristyanismo ha Pilipinas ngan an 500 years han first circumnavigation ha kalugaringon.
Sumala kan Guiuan Mayor Analiz Gonzales-Kwan, duro an ira pasalamat ngan kalipay nga hira an host municipality para ha selebrasyon sanglit naging mahugot an ira pangandaman.
Nahibaruan nga buwas nga adlaw in pagdudumaraon an highlight han selebrasyon kun diin pangungunahan ni Presidente Duterte an pag-unveil han historical marker ha Brgy. Ngolos Guiuan, Eastern Samar.
Makakaupod gihapon hini hi Spanish Ambassador to the Philippines Jorge Moragas Sanchez, National Quincentennial Committee (NQC) Chairperson and Executive Secretary Salvador Medialdea, Senator Bong Go, National Historical Commission of the Philippines (NHCP) Chairperson and concurrent NQC Executive Director Rene Escalante, Department of Energy Alfonso Cusi ngan pira nga mga local chief executives ngan miyembro han 500 years committee.
Ha pagkayana in padayon an gindudumara nga mga aktibidad ha Guiuan kasumpay han selebrasyon ngan ginsiguro naman han LGU nga mapapabilin la gihapon an social distancing ngan masusunod an mga health protocols ala kontra ha COVID-19.
