IRAN – Nagpahimatngon an International Energy Agency (IEA) nga an pankalibutan nga ekonomiya in ada ha ilarom han “major threat” mahitungod han krisis ha enerhiya, nga durot han nagpapadayon nga tensiyon ha Middle East, partikular na ha Strait of Hormuz.
Subay kan International Energy Agency Chief Fatih Birol, an presente nga sitwasyon in maikokompara ha mga oil crisis han 1970s ngan han epekto han pag-atake han Russia ha Ukraine han 2022.
Gintawag ine niya nga kumbinasyon han “two oil crises and one gas crash,” nga may-ada haluag nga epekto ha pankalibutan nga ekonomiya.
Gintagan-duon pa ni Birol nga “waray nasud nga makakatalwas” ha epekto kun magpapadayon an krisis, rason nga kinahanglan hin mas haluag nga global cooperation agud mapagaan an sitwasyon.
Kadungan hini, padayon an tensyon ha butnga han Estados Unidos ngan Iran, samtang nagpapabilin nga nakakapekto an sitwasyon ha Strait of Hormuz, usa nga importante nga agian han haros 20 ka-porsyento han pankalibutan nga lana ngan gas shipments.
Matungod han blockade ngan kasamok ha rehiyon, huminay an pagkiwa han suplay nga nagdurot han paghitaas han presyo han lana ha pankalibutan nga merkado.
