TACLOBAN CITY – Target han Eastern Visayas Medical Center o (EVMC) nga umabot hin 1500 an ihap han ira hospital bed para ha tuig 2028, subay han RA 11567 o an Hospital Development Plan.
Sumala kan EVMC Deputy Executive Director IV ngan Medical Center Chief II, Dr. Michael Jaro, ha pagkayana in may-ada hira 798 nga hospital beds kun diin an iba hini in nahimumutang ha gawas han wards mahitungod nga naghuhuot na an mga pasilidad.
An Main Building han EVMC in may-ada 447 nga kabug-usan han kama kun diin ha nasabi nga ihap 289 bed an aada ha Hospital Development Plan, 355 beds ha ward, ngan 92 beds naman ha hallway.
Mahitungod hine in makuri na daw an flow han hangin ngan naiibanan na gihapon an pagigin produktibo han mga staff.
Samtang, pira naman nga mga pasilidad han nasabi nga hospital an padayon pa nga gin-aayad pero gin gagamit na para ma-akomodar an ngatanan nga mga pasyente, sugad han Support Building, Tropical Medicine and Infections Disease Unit, ngan Mother and Child Building.
An plano naman nga Cancer Building in may-ada Hospital Development Plan nga 75 beds kun diin ginduduso ine nga matapos ngan magamit yana nga tuig-2026. Ine in mahitungod nga an EVMC la ha bug-os nga rehiyon an waray radiation facility, nga nagigin rason para magbiyahe pa an mga pasyente ha Cebu para han radiation treatment.
Ha lain nga bahin, an bag-o nga Psychiatry Building ha EV Magsaysay in may-ada naman 38 nga kama ha Hospital Development Plan ngan 10 nga kama ha ward hine, kun diin tikang ha Magsaysay in plano gihapon nga igbalhin ine ha EVMC Bagacay ngan kun operational na ine, an ikaduha ka-palapag in hihimuon nga Administrative Offices para magamit an Main Building han outpatient services.
An Multidisciplinary Building in mayda 180 ha Hospital Development Plan ngan 83 nga kama ha ward.
Samtang, padayon pa naman an construction para ha Trauma Building o Multi-Purpose Building nga mayda 279 beds ha Hospital Development Plan kun diin may-ada ini allocated budget nga P500 million para han masunod nga tuig, nga ine an magsi-serbe nga pasilidad para ha mga pasyente nga may trauma, sugad han mga naaksidente ha motor, ginpanbuno, ngan iba pa.
Ha 3rd floor ha nasabi nga building in igbubutang an bag-o nga hemodialysis facility, samtang an usa nga wing in para han Children with Disability sugad man han Veterans Ward para han mga retirado nga military personnel.
An ikaduha nga palapag in para ha mga operating rooms ngan Intensive Care Units, samtang ha ika-upat ngan ika-lima nga palapag in para ha mga pasyente nga may post-op trauma.
Ha ground floor in amu naman Trauma Emergency Room nga mayda CT scan, ngan blood bank facility ngan igbubutang gihapon dida an Women and Children Protection Unit (WCPU) para ha mga pasyente nga may emosyonal nga trauma.
An kabug-usan hini nga mga plano ngan istruktura in panuyo nga masiguro an episyente nga sakto nga serbisyo-medikal ha Eastern Visayas para hiton mas damo pa nga tuig. (via Bombo Shiela Encio)
