TACLOBAN CITY – Ginpailarom na ha state of calamity an bug-os nga probinsya han Eastern Samar mahitungod han nagtitikahitaas nga kaso han dengue.
Una na nga nagdeklara hin state of calamity an probinsya han Leyte han nakalabay nga mga semana mahitungod gihapon han mao nga sakit.
Sumala kan John Paul Roca, tagapagyakan han Department of Health (DOH) Regional Office 8, dako an bulig han mao nga deklarasyon para mapagawas an calamity fund han probinsya nga magagamit ha pagpalit han mga ginkikinahanglan ha pagkontra ha padayon nga paghitaas han dengue cases.
Dugang pa hini nga ha pagkayana in 57% na nga mas hitaas an dengue case kompara han nakalabay nga tuig ngan nagkaada na hin clustering of cases ha 200 nga mga barangays ha bug-os nga rehiyon.
Nahibaruan nga maabot na ha sobra 7,000 an kabug-usan nga kaso hin dengue ha bug-os nga rehiyon, rason para maupod an Eastern Visayas ha hotsport monitoring ha national dengue alert.
An mao nga ihap han kaso ha Sinirangan Bisayas in 10% ha kabug-usan nga dengue cases ha Pilipinas.
Samtang, nakipagsumpayan na an Department of Health (DOH) ha Department of Education (DEPED) nga tugutan an mga estudyante nga magsul-ot hin haglaba nga mga panapton labot la han ira mga school uniforms.
Ini in usa ha mga pitad han DOH agud nga mapugngan an paghitaas pa han kaso han dengue ha rehiyon kun diin mga kabataan an kasagaran nga apektado han mao nga sakit.
Sumala kan John Paul Roca, dako an maibubulig han mga higlaba nga panapton han mga kabataan ngan sugad man pagbutang hin mga insect repellant para maging proteksyon ala kontra ha mga lamok nga nagdudurot hin dengue.
Ha eskwelahan manggud gihapon an usa ha mga lugar nga kinahanglan nga tututukan nga pwede pagtikangan han dengue causing mosquitos sanglit padayon an ginbubhat nga monitoring han DOH ha mga eskwelahan.
Gin-aaghat gihapon han DOH an mga health officers nga magdumara health education ha mga kabataan bahin han sakit nga dengue.
Nanawagan gihapon an health department ha mga kag-anak nga atimanon an ira mga anak ngan kun mayda makit-an nga mga sintomas hin dengue in dayon nga igdangop ha mga rural health units o ospital.
