TACLOBAN CITY – Ha syahan nga adlaw han filing han Certificate of Candidacy duha nga incumbent nga Congressmen an gisasyahani nga nag-file ha Provincial Comelec.
Nag-file hin CoC hi Congressman Ching Veloso han ikatulo nga distrito han Leyte banda alas -10:07 hiton aga samtang sumunod naman haiya hi Congressman Henry Ong hiton ikaduha nga distrito.
An duha nga magbaralaud ini pareho myembro han PDP Laban nga parehas liwat nagtutuo nga makukuha nira an kadaugan.
Samtang, nagfile na gihapon hin CoC kumo mga board member han ikatulo nga distrito han Leyte hira Allan Ang ngan Atty. Anna Victoria Veloso Tuazon, anak ni Congressman Veloso.
Hi Veloso, nga natindog kumo chairman han committee on justice ha House of Representatives in ginhihingita an iya ikaduha katermino kumo representante han ikaduha nga distrito nga ginkukumpunir la hin unom nga bungto.
Samtang hi Ong naman in hingyap an ikaduha nga termino ha ikaduha nga distrito nga mayda naman 14 nga mga bungto.
An pareho nga magbaralaud in gin updan han tagsa tagsa hini nga mga supporters han ira pag-file han sertipiko de kandidatura.
Sumala haira nga damo nga mga proyekto nga programa an ira nabuhat nga haira pagkita makabubulig nga pili-on hira utro ngan tapuran han mga botante.
