TACLOBAN CITY – Patay na han makit-an an usa nga babaye samtang padayon naman nga ginbibiling an lawas han usa nga lalaki mahuman nga malumos ha kadagatan han Brgy. Sto. Niño Abuyog Leyte.
Ginkilala an mga biktima nga hi Rosayda Ng, 20 anyos an pangidaron, waray asawa ngan hi Michael Realino, 39 anyos an pangidaron, waray asawa, usa nga pedicab driver ngan pareho mga residente han Brgy. Victory ha mao nga bungto.
Sumala ha inisyal nga imbestigasyon han mga kapulisan, kaupod han mga biktima hi Samuel Gocila kun diin nag-irignom an mga ini ngan nagdesisyon nga mangarigo ha harani nga kadagatan. Mahitungod han kakusog han balud in naanod an duha nga biktima ngan nalumos.
Nakit-an an patay nga lawas ni Rosayda ha pangpang han dagat ngan dayon nga gindara ha Abuyog Municipal Morgue para ha post mortem examination samtang an lawas naman ni Michael Realino in padayon pa nga ginbibiling.
