TACLOBAN CITY – Waray pa may ginpapalusad nga kamanduhan iton Department of Trade and Industry (DTI) kasumpay han pagdidire o pagbabawal han pamaligya ngan pagpalit han mulayan nga lato-lato.
Mao-obserbaran nga hurak ha pagkayana iton pamaligya han nasabi ngan nauso nga mulayan labi na ha downtown area hiton syudad.
Sumala kan Anthea Aivi Borbon-Ancheta, Information Officer hiton Department of Trade and Industry (DTI) Regional Office 8, waray pa ginpapagawas nga mga aludayday an Head Office han Department of Trade and Industry (DTI) kasumpay han pagbabawal han nasabi nga mulayan, pero posible daw ine nga ig dire hiton hira ahensya in kaso nga gumawas ha test result nga ginbuhat hiton Food and Drug Administration (FDA) nga hitaas iton ihap hine ha lead o usa nga klase hin chemical.
Manunumduman nga nagpagawas hin public health warning an Food and Drug Administration (FDA) kasumpay han mulayan nga “Lato Lato Toys with handle glow in the dark Latto Latto Toy Toy Tok Tok Old School Toy Etek Toy Lato Lato Makasar” o kun Lato-Lato nga ginbabaligya liwat ha usa nga kilala nga online selling platform kun diin posible ine magdurot hin maraot nga epekto ha panlawas hiton mga magmumulay.
Ha pagkayana in naghuhulat la gihapon hira hiton magigin direktiba han ira Head Office kaparte han magigin kamanduhan hine kasumpay hiton nauso yana nga mulayan nga gintatawag nga lato-lato.
