NATIONAL – Papahilawigon han Department of Social Welfare and Development (DSWD) an ira ‘Walang Gutom Program’ (WGP) mahuman nga igpahayag han Social Weather Stations (SWS) an usa nga paghitaas han insidente han gutom ha mga pamilya nga Pilipino.
Subay ine ha gindumara nga survey yana nga bulan han Marso kun diin 27.2% daw han mga pamilya nga Pilipino an naka-eksperyensya hin involuntary hunger nga humitaas tikang ha 21.2% dida han nakalabay nga survey.
Ginpahayag ni DSWD spokesperson Assistant Secretary Irene Dumlao nga padayon nira nga ginpapahaluag an WGP agud mabuligan an mas damo nga lugar ha nasud.
Ha presente in nag-alutaga an DSWD hin P3,000 hin binulan nga bulig ha 300,000 nga mga kablas nga pamilya ha bug-os nga nasud.
Panuyo hine nga mabuligan 1.5 milyon katawo ngan plano nga pahaluagon pa ha 750,000 nga pamilya nga Pilipino pag-abot han tuig-2027.
