NATIONAL – Igin duon han Department of Social Welfare and Development (DSWD) nga an mga programa nga Ayuda sa Kapos ang Kita o AKAP ngan Assistance to Individuals in Crisis Situations o AICS in dire ginagamit ha pamumulitika.
Gintagan-duon ine ni Department of Social Welfare and Development Crisis Intervention Unit (CIU) Director Edwin Morata kumo baton ha mga batikos nga daw ginagamit an mga programa han gobyerno para ha pankalugaringon nga interes labi na dida han naglabay nga 2025 Midterm Elections.
Dugang pa hine, mayda mga ginpapatuman nga polisiya agud mapabilin an integridad han mga programa kontra ha hin-o man nga magpu-prubar nga gamiton ine ha pulitika sugad han gintatawag nira nga ‘anti-epal policy’ nga may panuyo nga mapabilin an seguridad ngan limitahan an presensya han mga pulitiko ha panahon han panhatag han ayuda.
Ginmalatumat gihapon ni Morata an Joint Memorandum Circular han DSWD nga ginpagawas kaupod an Department of Labor and Employment (DOLE) ngan National Economic and Development Authority (NEDA) kumo basaranan ngan giya ha pagpapatuman han programa.
Ine in agud masigurado an panuyuan hine nga makabulig ha mga empleyado nga habubo an sweldo ha minimun wage.
Kasumpay hine, gin klaro pa hine nga an AICS in dire la eksklusibo para ha mga kablas.
Ha ilarom han AICS, pwede nga makakuha hin bulig para ha lubong, medikal, pagkaon, transportasyon, ngan pambayad ha ospital gamit an guarantee letter. Naghahatag gihapon an programa hin psychosocial interventions sugad han psychological first aid ngan counseling.
