Usa nga gin-aalegar nga drug den an nadiskobrehan han mga otoridad ha Barangay Naval, Hilongos, Leyte, nga nagresulta han pag-aresto ha tulo nga mga suspek ngan pagkakumpiskar hin gin-aalegar nga shabu ngan mga drug paraphernalia.
Sumala kan Rogellet Urgel, Information Officer han Philippine Drug Enforcement Agency Regional Office VIII (PDEA-8), gindumara han mga otoridad an operasyon ha nasabi nga lugar nga nagresulta han pagdakop kan alyas “Vincent,” nga ginaalegar nga drug den maintainer.
Kaupod liwat nga nadakop hira alyas “Norvin,” nga ginaalegar gihapon nga drug den maintainer, ngan hi alyas “Fritz.” Gindakop liwat an unom nga menor de edad nga ginaalegar nga mga bisita ha lugar han operasyon.
Ha operasyon, nakumpiskar tikang ha mga suspek an 19.25 gramos nga suspected shabu nga ginbabanabana nga nagkakantidad hin P130,900, sugad man an mga drug paraphernalia nga ginkakawsa ha paggamit o pagbaligya hin ilegal nga droga.
Ginpahayag ni Urgel nga an mga nadakop in maatubang hin mga kaso tungod han ginaalegar nga pagtalapas ha Republic Act No. 9165 o Comprehensive Dangerous Drugs Act of 2002. Padayon liwat an pagproseso han mga dokumento ngan iba pa nga kinahanglanon nga proseso ha kaso.
Ha pagkayana, nakadetine na an mga nadakop ha kustodiya han mga awtoridad samtang nagpapadayon an legal nga proseso. Padayon naman an imbestigasyon han mga otoridad basi mahibaroan an iba pa nga impormasyon may kalabotan han gin-aalegar nga drug den.
