Nagpahimatngon an DORELCO hin bag-o nga power rate kasunod han pagpagawas han Energy Regulatory Commission (ERC) hin order nga may kalabotan ha Line Rental Charge o LLCC ha mga power bill han mga electric cooperative.
Sumala kan Chris Garcia, Assistant General Manager han DORELCO, maaram an publiko han sitwasyon han kuryente, labi na ha aspeto han tarifa han mga electric cooperative. Ginpahayag niya nga padayon an ira paningkamot nga matanggal an LLCC nga usa han mga nakakaapekto ha kabug-usan nga bayad han mga konsumidor.
Ginpahayag ni Garcia nga ginpamatian han ERC an ira mga panawagan ngan nagpagawas hin order nga may kalabotan ha pagtanggal han LLCC ha power bills. Tungod hini, an nahipatik nga tarifa han mga cooperative nga aada ha P16 kada kilowatt-hour in umubos ngan magigin P13 kada kilowatt-hour nala, o may pag-iban nga haros P3 kada kilowatt-hour.
Ginklaro ni Garcia nga an LLCC o line rental in may kalabotan ha generation cost ngan diri ini pareho han system loss. An LLCC in nagigin bayad ha proseso han pagpamiling hin generator o iba nga power source kon diri nakakasuplay hin igo nga kuryente an generation company ngadto ha mga lugar nga nanginginahanglan hin dugang nga suplay.
Dugang pa niya, diri la DORELCO an apektado hini nga sitwasyon kundi pati an 11 nga iba pa nga electric cooperative ha Eastern Visayas. Ginpahayag niya nga dako an panginahanglan hin kuryente ha rehiyon ngan diri pirme nakakaya han mga linya han National Grid Corporation of the Philippines (NGCP) an paghatag han ginkikinahanglan nga power supply.
Samtang, ginpatapod ni Garcia nga padayon an koordinasyon han mga electric cooperative ngan han mga may kalabotan nga ahensya para masolbar an mga hagit ha power supply ngan maparig-on an sistema. An pag-iba han LLCC ha power rate in usa nga ginalalauman nga makakabulig nga maibanan han kabug-usan nga baraydan han kuryente han mga konsumidor.
