TACLOBAN CITY – Utro nga nanawagan an Department of Health (DOH) Regional Office 8 ha publiko partikular na ha mga sisto endemic areas nga kumadto ha ira pinakahirani nga health center agud nga matagan hin medisina kaparte han ira gindudumara nga mass drug administration.
Sumala kan John Paul Roca, tagapagyakan han Department of Health (DOH) Regional Office 8, maabot na ha 7.8% an prevalence rate han sakit nga sisto ha bug-os nga rehiyon kun diin sobra 60 na nga mga lugar naideklara nga endemic areas.
Dugang pa hini, nga bisan man kun waray pa naaabat nga sintomas han mao nga sakit an usa nga tawo in importante la gihapon nga makatumar han ira ginpapanhatag nga medisina labi na gud kun nag-uukoy ini ha usa ha mga sisto endemic areas ha rehiyon.
Nahibaruan nga pinakaurhi nga naideklara nga endemic area ha rehiyon an Baybay City kun diin maabot ha 109 nga kaso hin sisto an nahipatik.
