NATIONAL – Gin klaro han Department of Energy (DOE) an panuyo han draft Department Circular (DC) kasumpay ha pag-titimpo han nuclear energy ha energy mix han nasud, ngan ginsigurado an commitment hine ha pagigin transparent, science-based, ngan maupay nga transisyon .
Ine in kumo baton ha pagkabaraka han publiko kun diin gintagan-duon han DOE nga dire panuyo han nuclear energy nga balyuan an renewable energy, kundi para suportahan la an malimpyo ngan madig-on nga suplay han kuryente ha nasud.
Dugang pa han DOE, an kantidad han kuryente tikang ha nuclear in mas “competitive” kumpara ha carbon ngan natural gas, labi na kun igkokonsidera an habubo nga operation life han mga planta.
Manunumduman nga kadungan ine han ginlalauman nga pagpirma ni Presidente Ferdinand Marcos Jr. han Philippine National Nuclear Energy Safety Act, nga magtukod ha Philippine Atomic Energy Regulatory Authority (PhilAtom) ngan magsisigurado han pinakahitaas nga standard han nuclear safety, security, ngan safeguards, subay na gihapon ha International Atomic Energy Agency (IAEA).
Dugang pa han ahensya, dire piniritay an paggamit han nuclear energy, mahitungod nga an distribution utilities an magdedesisyon kun sulod ba ha ”technically” ngan ”economically viable,” subay ha nagpapadayon nga procurement rules.
