Ginsalawad han usa nga abogado an petisyon agud bug-os nga igpagawas ngan igbuyagyag an draft committee report han Senate blue Ribbon Committee ha imbestigasyon hine kasumpay ha maanomaliya nga flood control projects.
Ginpasa ni Atty. Eldrige Marvin Aceron an Petition for Full Disclosure, subay ha katungod han publiko ha impormasyon kasumpay ha pampubliko nga interes ha ilarom han Article III, Section 7 han Batakan Balaod, nga nakakuha hin sobra 300 nga pirma.
Ine in mahuman nga magsarang an detalye han nag-leak nga kopya han nasabi nga draft report kun diin igin rekomenda han komite nga ginmamanguluhan ni Sen. Panfilo Lacson nga mapasakahan hin plunder ngan malversation an pira nga presente ngan anay senador, pati an pira nga opisyal han gobyerno.
Pero kahuman hine in ginbawi nira Sens. Migz Zubiri, JV Ejercito, ngan Win Gatchalian an pira pagpirma ha nasabi nga report.
Hangyo ha petisyon ni Atty. Aceron nga mapabilin an ‘unredacted version’ ngan obligahon an mga umatras nga senador nga ig eksplikar an rason han pagbawi han ira pirma.
Samtang, kalakip gihapon hine an panawagan nga pag-inhibit kan Sen. Ejercito ha mga pagdungog han ethics committee may paghisumpay kan Sen. Chiz Escudero.
Kun manunumduman, iginsalawad han abogado an usa nga ethics complaints kontra han senador mahitungod ha P30 milyon nga nakarawat nga campaign donation tikang kan Lawrence Lubiano ngan sobra P16 bilyon nga kontrata nga ginbuhat ha kompanya ni Lubiano.
An nasabi nga isyu in waray kaa-aksyuni han Committee on Ethics and Privileges sanglit iginsalawad an ikaduha nga petisyon kontra kan Ejercito mahitungod ha daw Gross Neglect of Constitutional Duty.
