Utro nga gintagan-duon han Department of Information and Communications Technology (DICT) an importansya han pakikigbinuligay ha magkaduru-dilain nga social media platforms ha gobyerno.
An nasabi nga pahinumdom in panuyo nga undangan an nagtitikaduro nga problema han mga gintatawag nga online harms, nga nagdudurot hin negatibo nga epekto ha damo nga indibidwal ngan ha bug-os nga kumunidad.
Gin pahimatngunan naman han ahensya an mga social media platforms nga kun dire hira makikigbinuligay in pwede hira maatubang ha mas mabug-at nga pitad, kaupod na an posibilidad nga ma-take down an ira mga platform ha nasud.
Syahan na nga ginpahayag ni DICT Secretary Henry Aguda an padayon nga paghitaas han ihap han mga reklamo nga nakakarawat han ira action center.
An nasabi nga mga reklamo in may paghisumpay ha magkaduru-dilain nga isyu nga nagtitikang ha social media platforms, kaupod na an pagsarang han fake news, mga online scam nga nangunguwat ha mga katawhan, ngan an paggamit hin deepfakes nga nagpapasarang hin mga peke nga video ngan audio.
