TACLOBAN CITY – Padayon pa an ginbubuhat nga assessment efforts han Office of the Civil Defense Region 8 kaupod an Local Disaster Risk Reduction and Management Council ngan Regional Disaster Risk Reduction Management Council, ha mga areas ha Sinirangan Bisayas nga nadarahigan han Magnitude 6.0 nga linog nga nahipatik ha San Julian, Eastern Samar dida han nakalabay nga adlaw.
Sumala kan Office of the Civil Defense 8 Regional Director, Joel Erestain Cese, nga dayon hira nakipag-koordinar ha mga concerned agencies ngan nag-deploy hin assessment teams agud madetermina an kahaluwag han gin-ighan han linog ha mga apektado nga lugar ha rehiyon.
Ini in agud masabtan gihapon an kinahanglanon nga interbensyun ha mga pamilya ngan indibidwal nga nadarahigan han pag-linog nga posible magkinahanglan hin assistance tikang ha gobyerno.
Dinhi naman ha Tacloban City in dayon nga nakipagkoordinar an buhatan City Engineering Office agud mag-assess kun mayda mga imprastruktura o mga kabablayan ha syudad nga nakaghipatik hin danyos mahitungod han linog kun diin, basar han ira inisyal nga assessment in waray pa naman hira may nahipapatik.
Samtang, ginmadohan naman an tanan nga lokal nga pangobyernuhan han rehiyon nga maghatag hin update pinaagi han mga field offices han RDRRMC VIII kasumpay han sitwasyon han mga “critical infrastructures” sugad hiton karsada, tulay, ospital, rural health units, iskuylahan ngan telecommunications tower agud masabtan an kabug-usan nga damage assessment ha Sinirangan Bisayas.
