NATIONAL – Manhahatag hin kadugangan nga bulig an Department of Human Settlements and Urban Development (DHSUD) ha mga residente nga duro nga naapektaran han mga naglabay nga bagyo.
Ha usa nga pahayag, igin paangbit nira DHSUD Undersecretary for Disaster Response Administrative ngan Finance Services Randy Escolango nga magdudumara utro hira hin mga relief operations.
Igpapanhatag ha ahensya an pira nga construction materials para ha mga residente nga nawarayan hin mga urukyan o nanginginahanglan hin mga materyales agud mapa-ayad an ira mga panimalay nga naguba mahitungod han mga bagyo.
Ine in pinaagi han Integrated Disaster Shelter Assistance Program (IDSAP) ngan han Housing Materials and Essentials (HOMES) kun diin ha ilarom han mga ine in makakarawat hin P10,000 an mga panimalay nga partially damaged, samtang P30,000 naman an makakarawat han mga kabablayan nga totally damaged.
Samtang, padayon naman ha pagpaabot hin bulig an magkaduru-dilain pa nga ahensya ha nasud agud hinay-hinay nga makabakdaw an mga residente nga nawarayan hin ira mga panimalay.
