NATIONAL – Igin pahayag ni Commission on Elections (COMELEC) Chairman George Erwin Garcia nga an Law Department han komisyon in mayda na gintitikangan nga polisiya para ha Anti-Discrimination ha maabot nga panahon han kampanya.
Ine in importante para na gihapon magkamay-ada hin pahimatngon ha mga kandidati para ha ira pangangampanya nga dire mambastos ha bisan hin-o ngan manginsulto hin tawo basar ha ira kinatawo o estado ha kinabuhi.
Dugang pa hine, ine nga polisiya in para ha pagkakaparehas han pagkita ha ngatanan nga tawo ha maabot nga piniliay.
Igin paangbit ine ni COMELEC Chairman George Erwin Garcia ha nagin pagpirma han Memorandum of Agreement ha butnga han komisyon ngan han The Philippine Anti-Discrimination Alliance of Youth Leaders (PANTAY Inc.).
Samtang, ginhangyo gihapon han nasabi nga opisyal nga unta in mas damo pa nga organisasyon, sugad han PANTAY Inc., an makipagbinuligay ha komisyon para ha magkaduru-dilain pa nga perspektibo nga nakikit-an para ha pangandaman ha Eleksyon 2025.
