TACLOBAN CITY -Padayon nga gin-aaghat han Department of Health Easten Visayas an publiko, partikular na yana nga panahon hiton kat-uran nga magin responsable ha pag-ato hiton mga lamok.
Ha maabot 195 nga nasud ha bug-os nga kalibutan ngan api ha World Health Organization o WHO, an Pilipinas in usa ha mga mayda padayon nga paghitaas han mga kaso han dengue.
Sumala ha mga pag-aram ngan rekord han World Health Organization, kada tuig may-ada 390 ka milyon nga kaso han dengue nga nahirereport ngan yinukot naman an namamatay hini.
Sumala kan Leonido Olobia, Program Manager Department of Health Region 8, maabot ha 2,202 nga kaso hin dengue ngan 5 nga namatay ha bug-os nga probinsya han rehiyon 8, tikang Enero kutob Hunyo 28, 2025.
Sanglit, gin aaghat han Department of Health o DOH nga makigbinuligay an LGUs ngan Brgy ha Dengue Prevention para makalikay ha sakit durot han kagat han lamok.
Pira ha mga pamaagi agud nga malikayan an pagdamo han mga lamok, in ighuwad an naka stock nga tubig ngan maghugaw, magdumara hin fogging activity, mahibaro ha fist aid response, ngan magin malimpyo ha iyo mga libong sugadman maki-usa ha barangay cleanliness activity, nga makakabulig nga maibanan an pagdamo han lamok ha panahon han tag-uran.
Subay ha Global nga Open Dengue database, tikang ha tuig 1955 hasta 2023, aada na ha 2,822,549, an natala nga kaso ha Pilipinas, kun diin ang mga kabataan an may pinakadamo nga kaso yana nga tuig 2025.
