Igin rekomenda ni anay Supreme Court Senior Associate Justice Antonio Carpio nga magkakamay-ada hin serye han mga debate ha butnga nira han Sen. Rodante Marcoleta kasumpay han West Philippine Sea.
Ine in kasunod han panukala ni Marcoleta nga magin abri an debate tikang ha legal, historical, ngan geopolitical aspect han West Phillipine Sea, mas haluag kumpara ha panukala ni Carpio nga ig limita la anay an topic ha kun mayda ba WPS ha ilarom han balaod han Pilipinas ngan kun an mga maritime feature ha kadagatan in sakop han teritoryo han nasud.
Ha pakighimangraw han Bombo Radyo Philippines kan Justice Carpio, gin malatumat hine nga duro hin kahiluag an sakop han pahayag ni Marcoleta.
Kun karuyag daw han bagito nga senador, in pwede nira ini pagdumaraon hin pira kahigayon ngan sasakupon an ngatanan han anggulo kasumpay ha gin aagawan nga kadagatan.
Pero ha syahan nga debate, kinahanglan daw anay nga pag-istoryahan kun mayda ba WPS ha ilarom han balaod han nasud.
Nadig-on gihapon an anay mahistrado nga kinahanglan mayda opisyal nga ‘parameter’ an debate ngan dire la basta nakadepende ha kun ano an karuyag nira pag-istoryahan.
Kun mahuman an syahan ngan mapag-istoryahan an legal foundation han WPS, in pwede pumili hi Marcoleta han karuyag niya paghisgotan nga topic ha WPS.
