TACLOBAN CITY – Nagpapadayon an monitoring han City Business Permit and Licsencing Division ha mga resort ngan sugadman ha mga establishmento ha syudad nga nahihingalimot na nga magsunod han iginpapatuman nga mga health protocols kontra COVID-19.
Usa ha mga mahugot nga ginpahimatngunan han mao nga pamunuan an mga beach resort o mga kariguan ha syudad labi na yana nga Semana Santa kun diin ginlalauman nga damo nga mga tawo an mapadagat para mangarigo.
Sumala kan Gemafiel Gaspay, Head han City Business Permit and Licsencing Division, padayon an ira pahinumdom ha mga ini nga ipatuman an mahugot nga pagsunod ha mga health protocols kontra COVID-19 sugad han pagsusul-ot hin face mask, face shield ngan pag-obserbar han physical distancing.Nanawagan gihapon an mao nga opisyal ha mga tag-ada han mga beach resort ngan establishmento nga magpatuman hin reservation policy agud nga malimitaran an makakasakob nga mga tawo.
