Natuod an Department of Foreign Affairs (DFA) nga diri nakakabulig ha “maupay ngan maribhong” nga relasyon han Pilipinas ngan China an pagdidiri han Beijing ha pagpasulod han mga opisyal han Kalayaan, Palawan.
Iginbawal han China an pagpasulod han 16 nga opisyal han Kalayaan, kaupod an HongKong ngan Macao, mahuman ideklara nga persona non grata han lokal nga gobyerno an Chinese Ambassador nga hi Jing Quan mahitungod ha pagtalapas ha diplomatic protocol ngan panginlabot ha internal affairs han Pilipinas.
Subay ha DFA, bisan man kun katungod han usa nga naasud nga magpatuman hin travel ban, dire ine makakabulig ha pagpapakusog han bilateral relations ngan people-to-people exchanges nga parehas iginpatapod han Pilipinas ngan China.
An Kalayaan an nag-uusaan nga munisipalidad han Pilipinas nga makikit-an ha West Philippine Sea. Padayon naman nga gin aangkon han China an haros bug-os nga kadagatan ha kaluyo han international ruling nga nagpapahayag nga waray legal nga basaranan an ira claim.
Ha mga naglabay nga tuig, dumuro na gihapon an tensyon ha butnga han duha nga nasud mahitungod ha mga insidente ha kadagatan, kaupod an bungguay ngan paggamit han water cannon kontra ha mga barko nga Pilipino
