TACLOBAN CITY – Igin anunsyo han Pag-IBIG Fund nga abre na utro an ira naman Calamity Loan Program ngan moratorium ha pagbabayad han mga housing loan han mga naapektaran han nakalabay nga bagyo Kristine dinhi naman ha Sinirangan Bisayas.
Ha iginbuhat nga Kapihan sa Bagong Pilipinas han Philippine Information Agency Region 8, iginyakan ni Alectys Bajarias, Pag-IBIG Fund Acting Area Head for North Central & Eastern Visayas, nga kun an miyembro nira in aada naukoy o nagtratrabaho ha mga lugar nga iginpailarom ha State of Calamity in puydi mag apply para hin Calamity Loan ngan pati gihapon an usa ka bulan nga moratorium ha pagbayad han mga Housing Loan.
Ini daw in agud nga mabuligan an mga nagkabibiktima han bagyo nga makatalwas ha nag agi nga krisis.
Kun mahihinumduman in pira nga mga bungto ngan lugar ha Northern Samar ngan Eastern Samar an nagdeklara hin State of Calamity tungod han nag agi nga bagyo.
Puydi mag apply an mga ini han Calamity Loan nga gindesinyo para maibanan an gin aabat nga kakurian mahitungod han nag agi nga bagyo, nga kun diin naman, an kwalipikado in puydi humuram kutob 80% han iya naman kabug-usan nga Pag-IBIG Regular Savings nga mayda liwat habubo nga 5.95% nga interes kada tuig nga puydi naman bayaran ha sulod hin duha ngada ha ikatulo katuig.
Pagklaro pa ni Bajarias nga an Housing Loan payment moratorium program naman in an pagbayad nga puydi lat-angan nga waray dugang nga kabaraydan.
Puydi mag apply an mga kwalipikado nga mga miyembro kutob naman ha Disyembre 31, 2024 pinaagi ha Virtual Pag-IBIG o ha pinakahirani nga branch ngan satellite offices.
