BORONGAN CITY – Ginpailarom na ha State of Calamity an syudad han Borongan mahitungod han mga kaso han African Swine Fever nga nahipatik ha nasabi nga syudad.
Sumala kan Borongan City Veterinary Office Head, Dr. John Adrian Ang, nagdeklara hira hin State of Calamity agud makapagpa-gawas hin pondo para makabulig ha mga apektado han nasabi nga nasakit ha baboy, labi na ha mga parag-baboy han syudad.
Labot pa hine, mayda gihapon mga bag-o nga barangay nga nagkamay-ada hin mga bag-o nga kaso hin African Swine Fever, kun diin ha pagkayana in ginpapanginano na han ira buhatan kun tinuod nga positibo an mga ine mahitungod nga may-ada daw gihapon nahipatik nga namatay nga mga baboy.
Samtang, tikang ha duha nga barangay nga ada ha ilarom han imbestigasyon kabahin han nasabi nga sakit in nadugangan pa ine hin usa, an mga ine in amu an—Brgys. Maypangdan ngan Tabunan, nahipatik naman ha Brgys. Siha ngan San Jose an kaso han pagkamatay han pira nga mga baboy.
Ada naman ha purluminos 157 nga kaso hin pagkamatay hin baboy tikang ha 11 nga backyard farmers an nahipatik ha Brgy. San Jose samtang ha may bisinidad naman han Eastern Samar State University in ada ha 21 nga baboy an nahipatik nga namatay ngan unom naman an ginpatay pinaagi han depopulation.
Ha lain nga bahin, ginpasabot naman hine nga an ira la tatagan hin indemnification in adton mga parag-baboy nga dire insured o rehistrado ha ilarom han Philippine Crop Insurance Corporation (PCIC)
Ha pagkayana in dire pa naman nasisigurado han nasabi nga opisyal kun kutob san-o an magigin kaiha han pagpa-ilarom ha State of Calamity han nasabi nga syudad mahitungod nga nagtitikang pala daw hira nga pugngan an mas duro pa nga pagsarang pa han nasabi nga sakit.
