NATIONAL – Gintikangan na an konstruksyon han bag-o nga river wall ha Barangay San Jose, Navotas City mahuman nga lumaprak an dati nga pader hine dida han Hunyo 28, nga nagdurot hin grabe nga pagbaha ngan nakaapekto ha mga residente.
Subay ha Department of Public Works and Highways (DPWH), babalyuan an temporaryo nga sandbag ngan plywood wall hin madig-on ngan permanente nga istruktura.
Sugadman, nababaraka la gihapon an mga residente samtang dire pa human an proyekto, labi na yana nga tag-uran.
Gin kumpirma naman han barangay official nga nagtikang na an konstruksyon dida han Hwebes ngan kinahanglan in mahuman dayun ugsa umabot an makusog nga uuran.
Subay naman ha Navotas City Public Information Office, naiipit an trabaho mahitungod han dagko nga balud ngan pagbugso-bugso nga uran, pero gindadagmitan la gihapon an paghikuman han proyekto.
