TACLOBAN CITY – Ginpahibaro han AMA Computer Learning Center ACLC Tacloban , nga magpapatuman hira hin option sugad han Hybrid modality, kun diin magkakamayda hira hin face to face classes, Learning management system, ngan sugadman virtual via google meet yana pag-abre hiton klase ha adlaw hiton Lunes.
Sumala kan Ceasar Silay, School Dean han ACLC Tacloban, nga an mao nga panutduan in kumo pagsunod la gihapon han mga health protocols nga ginpapatuman ilabi na nga nagpapadayon pa an COVID-19.
Ha lain nga bahin, ginpaangbit naman hine nga mayda hira increasing ha numero han mga namag-enroll nga mga estudyante, kun diin ginlalauman pa ine nira nga madudugangan kutob ha Setyembre 12 kun diin ine an petsa han pagtikang han ira klase ha mao nga eskwelahan.
Ginpanagbit naman hine nga nagpapabilin naman an tuition fee, ha mao nga ekskwelahan ngan naghahatag gihapon hira hin discount ha mga new students nga mag-eenroll para yana nga school year.
Hapagkayana, nangunguna nga damo an ihap han mga nagpa-enroll ha kurso hiton Information Technology IT , ginsusundan han kurso nga Hospitality Management, Business, ngan Health Care Services.
Ginpaangbit naman hine nga mayda mga transferees nga mga estudyante tikang ha mga public schools nga mga nagpa-enroll ha mao nga eskwelahan.
Para naman ha ira laboratory classes, pananglitan mayda an mga ine klase 4 ka meeting kada semana, hihimuon han mao nga eskwelahan nga kaka-usa la masulod an estudyante ha usa kasemana han ira laboratory ngan an nasasalin naman in ha sunod na nga semana hangtod nga mahuman an ira laboratory classes.
