Nanawagan hi Tingog party-list Rep. Jude Acidre kan Navotas Rep. Toby Tiangco nga undangan an panguwat ha publiko kasumpay han mga alegasyon ha impeachment kontra kan Vice President Sara Duterte.
Iginduon ni Acidre nga waray ebidensya an akusasyon nga gintagan hin ayuda ngan proyekto an mga magbabalaod kabalyo han suporta ha impeachment.
Dugang pa, an seryoso nga akusasyon in kinahanglan mayda klaro nga ebidensya ngan dire hurob-hurob o chismis.
Gin panhimuwa gihapon ni Acidre an pahayag nga mayda natudlok na nga pagtalapas kontra kan anay Speaker Martin Romualdez, subay ha Independent Commission for Infrastructure (ICI).
Sumala kan Acidre, klaro ha dokumento han komisyon nga waray ini natudlok nga pagsayop o pagbaton, ngan usa la ini nga referral para ha kadugangan nga imbestigasyon.
Gin ayat ni Acidre hi Tiangco nga magpagawas hin ebidensya ngan ngaranan an mga dabi kun mayda gud basaranan an iya mga panahayag.
Gintagan-duon ni Acidre nga waray panunuhol o pamimirit nga nahitabo ha mga magbabalaod nga pumirma ha impeachment complaint.
Sumala pa, personal niya nga nakit-an an paghingaday ha pagpirma ha impeachment complaint ngan hadto nga panahon in waray hi Rep. Tiangco.
Dugang pa hini, an pagpapasarang hin waray basaranan nga impormasyon in nakakaruba ha integridad han Kamara ngan nagpapahinay ha pagtapod han publiko.
