Gin sigurado ni Senator JV Ejercito nga dire magagamit an panukala nga nasyunal nga budget para ha 2027 agud impluwensyahan an impeachment trial kontra kan Vice President Sara Duterte.
Kumo chairman han Senate Committee on Finance, igindiwra ni Ejercito an alegasyon han bise presidente nga posible gamiton an pondo han gobyerno kumo gamit ha pamumulitika ngan pan aaghat ha mga magbabalaod nga bumutos hin pabort ha iya conviction ha impeachment trial.
Syahan na nga gin kwestyon ni Duterte kun kay-ano ginagamit an panukala nga 2027 national budget ha daw panhatag hin salapi ngan pakikipagsabot nga pampulitika kasumpay ha impeachment proceedings.
Iginpunto niya nga kinahanglan nakapukos an pondo han gobyerno ha pagseserbi ha mga Pilipino, imbes nga gamiton agud impluwensyahan an mga senador nga magseserbi nga hukom ha pagdungog ngan an mga membro han House of Representatives.
Waray naman tudloka han bise presidente an mga partikular nga transaksyon o indibidwal nga daw dabi ha ginpapahayag nga pamumulitika.
Sumala kan Ejercito, naglalaum hiya nga dire pagdududahan han mga senador nga magseserbi nga senator-judges ha impeachment trial.
Ginmalatumat niya nga damo an problema ngan ayat an kinahanglan tutukan han gobyerno, pero kaparte han responsibilidad han mga senador an pagtuman ha ira konstitusyunal nga responsibilidad ha impeachment proceedings.
Utro hini nga iginduon nga dire tutugutan nga gamiton an nasyunal nga budget para ha nasabi nga panuyo, ngan gintagan-duon nga kumo tagmangulo han Senate Finance Committee, trabaho niya nga seguraduhon nga maupay an pagkapot ha panukala nga pondo han gobyerno.
