Iginduduso ni Parañaque 2nd District Rep. Brian Yamsuan an pagpapahamtang hin mabug-at nga sirot ngan pagsuspendi o pagbawi hin permit ha mga kumpanya hin utility nga dire nagtatanggal hin mga dire na ginagamit nga kable ha mga poste.
Ha ilarom han House Bill No. 11461, panuyo nga tanggalon an mga nakabalighot o nakalaylay nga kable o “spaghetti wires” nga nagdudurot hin kadelikaduhan ha publiko ngan imprastraktura.
Ginmamanduhan gihapon han panukala an mga utility providers nga aydun ngan igpabilin nga talwas an mga kable, tanggalon an mga dire na nagana, ngan aydon o balyuan an mga ruba nga poste. Kinahanglan daw gihapon siguraduhon nga nagsusunod ha igintalaan nga safety clearance an mga linya ngan regular nga inspeksyunon an ira mga pasilidad.
Ha oras nga magin balaod an nasabi nga panukala, tatagan an mga kumpanya hin usa katuig agud magsunod. Papahamtanagan hin P300,000 nga multa an mga dire masunod ha probisyon ha katalwasan ha sulod han palugit, samtang papagmultahon naman hin dire maubos ha P100,000 ha kada adlaw han pagtalapas an mga dire magtatanggal han mga parong nga kable.
Ha ilarom gihapon han panukala, babatunon han mga utility company an bug-os nga kantidad han danyos ha propyedad ngan gastuson nga medikal kun mayda maaksidente ha ira mga kable, labot pa ha multa nga dire maubos ha doble nga kantidad han mga gastuson.
Ginmamanduhan gihapon an mga lokal nga pangobyernuhan nga mahugot nga bantayan an mga nasabi nga kumpanya kun nagsusunod an mga ini ha balaod, ngan pwede hira suspendihon o bawion an mga permit han mga magtatalapas ha aludayday ha katalwasan.
