Gindumara han Department of Agrarian Reform (DAR) Region VIII an awarding ceremony han Pelikula Agraryo 2026 Eastern Visayas Short Film Festival dida han Oktubre 12, kun diin ginkilala an mga nagdaog nga magrerepresentar han rehiyon ha nasyonal nga kompetisyon ha syahan nga semana han Disyembre.
Sumala kan Jose Alsmith Soria, Information Officer han DAR Regional Office VIII, may duha nga kategorya an kompetisyon, an Agrarian Reform Beneficiary (ARB) Category, nga nagpapakita han mga indibiduwal nga agrarian reform beneficiaries o mga benepisyaryo han SPLIT Program, ngan an Agrarian Reform Beneficiary Organization (ARBO) Category, nga nagpapakita han mga organisasyon han mga benepisyaryo han reporma ha tuna.
Ha ARB Category, nagdaog an entry han Visayas State University (VSU) Baybay nga “Sa Asa Dapit Nag-ampo an Hangin,” nga nakakarawat hin P60,000 nga premyo. Nakuha naman han “Si Tatay Nan Bahala” han Samar Colleges Incorporated an ikaduha nga pwesto ngan P30,000, samtang an “Pagsirang” han VSU Tolosa an ikatulo nga pwesto ngan P20,000.
Ha ARBO Category, nagdaog an “Asa an Akung Balay” han Biliran Province State University (BiPSU), samtang an “An Butil” han Northwest Samar State University (NWSSU) ha Calbayog City an ikaduha nga nagdaog. An mga nanguna nga entry ha tagsa nga kategorya an magrerepresentar han Eastern Visayas ha nasyonal nga kompetisyon.
Sumala kan Soria, panuyo han festival nga aghaton an mga batan-on nga magin kaparte ha pag-aghat ngan pagdepensa han agrarian reform pinaagi han pelikula. An mga short film in basar ha tinuod nga mga istorya han mga agrarian reform beneficiaries ngan nagpapakita kon paonan-o hira nag-uswag pinaagi han bulig han DAR.
