Gindig-onan han Presidente han National Association of General Managers of Electric Cooperatives ngan General Manager han Leyte III Electric Cooperative (Leyeco III) nga hi Allan Laniba nga diri na kinahanglan hin bag-o nga balaud agud matanggal an systems loss ha kuryente, tungod mayda na mga probisyon ha Republic Act No. 7832 nga nagmamando ha Energy Regulatory Commission (ERC) nga magmonitor han systems loss.
Sumala kan Laniba, may-ada katungod an ERC nga magpagawas hin kamanduan may kalabotan ha pagdumara ngan pagkontrol han systems loss. Ginklaro niya nga basar han RA 7832 o Anti-Electricity and Electric Transmission Lines/Materials Pilferage Act of 1994, an systems loss nga gintutugotan ha mga electric cooperative in nagtikang ha 21 porsyento, ugsa ini hinay-hinay nga ig-ubos ngadto ha 16, tikadto ha 14 ngan mas ubos pa ha 12, samtang nagtitikaduro an pag-uswag han teknolohiya.
Dugang pa niya, ginkonsiderar han ERC an lokasyon han mga electric cooperative han angay nga systems loss cap, tungod kay magkadurudilain an sitwasyon ha mga highly urbanized city (HUC) ngan ha mga rural nga lugar. Ha syudad, mas madagmit maibanan an systems loss tungod kay mas gutiay an mga problema ha linya ngan mas hamubo an electrical resistance, labot la kon damu an mga kaso han pangawat hin kuryente.
Sumala kan Laniba, ha mga rural nga lugar pareho han mga nasasakupan han Leyeco III ngan Leyeco IV, aada ha 10.25 porsyento an systems loss cap, nga lakip na han gintutugotan nga technical loss. Mas daku an mga ayat ha pag-ubod hini tungod han sitwasyon han mga linya han kuryente ngan han lokasyon han mga konsumidor.
Tungod hini, ginpabug-atan ni Laniba nga an ira karuyag nga tanggalon pinaagi han ginduduso nga Systems Loss and Lower Electricity Rates Act amo an non-technical losses, labi na an mga pangawat hin kuryente, ngan diri an teknikal losses nga nahitatabo ha proseso han paghatag hin kuryente.
