Sumaka ha 7.2 porsyento an headline inflation ha Pilipinas dida han Setyembre tikang ha 6.1 porsyento dida han Agosto, nga nagpapakita han mas madagmit nga paghitaas han presyo han mga produkto, partikular na han pagkaon ngan iba pa nga panguna nga panginahanglan.
Sumala kan Gerwyn P. Enerlan, Assistant Professor Economics han Division of Social Sciences ha UP Tacloban College, usa han mga nagduduso han inflation amo an paghitaas han presyo han food ngan non-alcoholic beverages, nga nakakaapekto ha adlaw-adlaw nga paggasto han mga panimalay.
Dugang pa ni Enerlan, humitaas naman hin 1% an inflation ha sektor han transportasyon, samtang humitaas gihapon an inflation han bugas ngan iba pa nga panguna nga produkto.
Mas mabug-at naman an epekto hini ha 30 porsyento han poorest nga household ha nasud, nga nakakaeksperyensya hin 9 porsyento nga inflation. Karuyag sidngon, mas daku an epekto han paghitaas han presyo ha mga kablas nga pamilya.
Ginpahayag ni Enerlan nga an padayon nga paghitaas han inflation in mahitungod han energy crisis nga naeksperyensyahan han nasud ha siyahan nga quarter han tuig. Dugang pa niya, an naeksperyensyahan nga inflation tikang Enero ngan Setyembre in hitaas kumpara han 2-4 porsyento nga inflation rate target han Bangko Sentral ng Pilipinas (BSP).
