Nagpakusog han kapasidad han mga tropa ha pag-atubang ngan pagresponde ha mga explosive ordnance an 93rd Infantry Battalion han Philippine Army, kasumpay han pagkadiskobre ngan pagdetonate han mga granada nga ginkikita nga tikang ha mga arm cache han mga rebelde ha Leyte.
Sumala kan LTC. Celeste Frank Sayson, Commanding Officer han 93rd Infantry Battalion, nahitabo an pagdetonate han mga granada kakulop, eksakto alas-11:45 han udto. An iya unit amo an nakakasakop han bug-os nga Leyte Island, Southern Leyte ngan Biliran.
Ginpahayag ni Sayson nga mayda hira ginbubuhat nga operasyon ha pag-aresto o pagdakop ha mga miyembro han NPA, partikular ha mga miyembro han Platoon 1, IC Livox, nga ginpahayag niya nga 12 na la an nahibilin nga miyembro. Mayda liwat nakarawat nga impormasyon an militar nga nagbulig ha ira ha pagtudlok han usa nga lokasyon nga ginkikita nga arm cache han grupo, nga may kalabutan ha mga anay rebelde nga nag-devolve na.
Sumala pa ha iya, nakigkoordinate an 93rd Infantry Battalion ha PNP Explosive Ordnance Disposal (EOD) ngan ha EOD han Philippine Army ha pag-atubang han mga explosive ordnance. Ginpahayag niya nga ini an siyahan nga higayon nga an Explosive Ordnance Reconnaissance (EOR) nagkamay-ada hin sugad hini nga test mission, nga nagresulta ha dugang nga pag-develop han ira kapasidad ha pagresponde ha mga explosive ordnance.
Dugang pa ni Sayson, mayda liwat hira impormasyon tikang ha ira intelligence nga nagin basehan han mga operasyon ngan pag-imbestigar may kalabotan han mga arm cache. Tungod hini, ginpapakusog liwat han militar an ira mga personnel ha posible nga mga explosive ordnance agud masiguro an seguridad han mga komunidad ngan han ira mga tropa.
Ha pagpadig-on han ira kapasidad, nagdara an 93rd Infantry Battalion hin 54 nga estudyante para ha Explosive Ordnance Reconnaissance Agent (EORA) Training, kun diin maabot ha 40 nga CAFGU, 10 nga reservist, ngan upat nga regular nga sundalo han Infantry Battalion, nga pag-aandaman ha mga pamaagi han paghibaro, pagreport ngan igo nga pagresponde ha mga explosive ordnance.
