TACLOBAN CITY – Ginpailarom ha surveillance han Department of Health (DOH) Regional Office 8 an maabot 37 nga mga indibidwal nga may direct contact han 6 anyos nga bata nga gintutuuhan nga namatay mahitungod han sakit nga meningococcemia ha Tacloban.
Sumala kan John Paul Roca, tagapagyakan han DOH 8, dayon hira nga nakipagsumpayan ha City Health office ngan han barangay kun diin tikang an mao nga bata agud nga mamonitor an mga tawo nga may direkta nga contact han biktima.
Ipapailarom ha monitoring an mao nga mga indibidwal ngan gintagan hin prophylaxis nga antibiotic ha sakob 14 diyas.
Dugang pa ni Roca, na ha pagkayana subay ha ira monitoring in waray pa may nakikit-an nga sintomas hin meningo ha mao nga indibidwal ngan kun inkaso nga may makit-an hira nga sintomas in dayon ini nga dadad-on ha ospital.
