NATIONAL–Ginpailarom ha restrictive custody an 22 kapulisan nga ginaalegar nga kalakip ha hazing ha ginbabanabana nga 100 nga bag-o nga recruits ha Lamitan City, Basilan, sumala ha Philippine National Police (PNP).
Kalakip hine an 8 nga police commissioned officer ngan 14 ka non-commissioned officers.
Sumala kan PNP spokesperson Police Brigadier General Randulf Tuaño, 12 ha ira, kalakip an commander han Regional Mobile Force Battalion (RMFB)-14B an ginkasuhan ha pagtalapas ha Anti-Hazing Act of 2018.
Sumala ha PNP spokesperson, an commander han RMFB-14B in dire la mabaton ha command responsibility, kondi ginaalegar nga nakit-an gihapon nga mayada pisikal nga presenta samtang nahitabo an insidente.
Nagpapadayon la gihapon an imbestigasyon kasumpay han mga giniimbestigahan han mga otoridad ha ira partisipasyon.
Labot la ha 22 kapulisan, 55 pa nga personnel han RMFB-14B an gintanggal anay ha ira mga pwesto, sanglit umabot na ha 77 an kabugosan nga ihap han mga kapulisan nga nahiupod ha isyu.
Samtang, ginkalro naman ni Tuaño nga dire nangunguruyag-sidngon nga ngatanan ha mga gin-relieve in mayada direkta nga partisipasyon ha hazing ngan temporaryo nga gintokahan nga mag-report ha regional headquarters samtang ginbubuhat an imbestigasyon.
