TACLOBAN CITY – Maabot hin 215 nga mga pusil ngan explosives iton ginguba ha usa nga seremonya ha 8th Infantry Division kakulop, Pebrero 25.
Kadam-an hini nga mga armas in ginsurender han mga dati nga rebelde ngan pipira liwat iton nakumpiskar ngan narekober ha mga military operations tikang dida han 2011 kutob 2019.
An pagruba hini nga mga armas in gintatawag nga “demilitarization” kon diin gin – uutod utod an parte hini nga mga pusil pinaagi hin paggamit hin metal bond saw ngan kahuman in ginsusunog ini.
Ginpangunahan an “demilitarization” han Commanding General hiton Philippine Army nga hi Lt. Gen. Gilbert Gapay ngan commander hiton 8th Infantry Division nga hi Maj. Gen. Pio Diñoso III.
Gindayaw ni Gapay an paningkamot han 8th Infantry Division nga makab-ot an kahimyang ha rehiyon ha luyo han mga limitasyon hini.
“Sa laki ng area of operation ng 8th Infantry Division, talagang kulang na kulang kayo sa battalion. May kakulangan din tayo sa kagamitan at resources pero naitala pa rin natin yong mga accomplishments na ito. You’ve surpass my expectation. You deliver more with less.” pahayag ni Gapay ha usa nga mensahe.
An mga nakumpiskar ngan ginsurender nga mga pusil ngan mga explosives o paburuthon ngan an pagsurender han pipira nga mga lider han New People’s Army kaupod na an ira mga supporters in nangangaruyag sidngon la daw nga maluya na iton impluwensiya han mga NPA ngan malinampuson an anti- insurgency campaign han gobyerno.
Mababaruan nga target hiton gobyerno nga puypuyon iton insurhensiya ha nasod san-o mahuman an termino ni Presidente Duterte ha 2022.
