TACLOBAN CITY — Arestado an duwa nga miyembro han CPP-NPA mahuman nga makuhaan hin improvised explosive devise (IED) ngan mga armas ha gindumara nga combat patrol operation han 20 IB ha Brgy Henogawe, Gamay, Northern Samar.
Ginkilala an mga suspek nga hira Agosto Baldoza, alyas Allan ngan Ricky Capoquian pareho mga residente han mao nga barangay.
Sumala kan Capt. Reynaldo Aragones, Division Public Affairs Chied 8 ID, nagdudumara hin combat patrol an mga tropa han 20 ID han makatapo han mga ini an duwa nga suspek ngan han nadaopon ngan inspeksyon an mga dara hini nakitan an usa nga IED, usa nga calibre 45 pistol nga may usa nga magazine nga loaded hin 6 ka rounds hin ammunition.
Han pakianhan an mga suspek gin-amin han mga ini nga ginsugo hira han communist terrorist leader (CTL) nga hi Rosalinda Esponilla, alyas Meagan nga igtanom an mao nga IED ha aagi-an han mga sundalo nga nagpapatrol.
Nahibaruan nga an duwa nga suspek in pareho miyembro han CPP-NPA ngan nagpartisipar han natabo nga pan aatake ha Gamay Municipal Police Station dida han tuig 2004.
Ha pagkayana in nagpapabilin ha kustodiya han Gamay Municipal Police Station an mao nga mga suspek samtang pormal nga ginsasalawad na an kaso ala kontra ha mga ini ha Provincial Prosecutor’s Office ha Laoang, Northern Samar.
