TACLOBAN CITY – Maabot na 35,000 nga mga Pilipino ha Israel an nabakanuhan na ala kontra ha COVID-19.
Ini an ginpahayag ni Marc Pleños, Bombo International Correspondent tikang ha Tel Aviv Israel.
Sumala kan Pleños, waray naman magruhaduha an mga Pinoy ha Israel nga magpaturok hin COVID-19 vaccine ha kaluyo han mga reports nga may naawatan hin kinabuhi nga mga pasyente pira kaadlaw mahuman nga magpaturok han bakuna nga Pfizer.
Dugang pa hini nga ha iya mismo eksperyensya in waray naman hiya naabat nga urusahon ha iya panlawas ha syahan nga dose han vaccine nga ginturok ha iya ngan han ikaduha nga dose in nakaabat hiya hin ul-ol ha injection pero waray gihapon malain nga reaksyon an lawas mahuman nga magpabakuna ha ikaduha kahigayon.
Mahinunumduman nga gumawas an report ha Norway han naglabay nga mga semana bahin han pira nga mga kalagsan nga may mga sakit nga naawatan hin kinabuhi mahuman an pira kaadlaw tikang han pagpaturok hin bakuna.
