NATIONAL–Ginsigurado han Armed Forces of the Philippines (AFP) nga magpapabilin nga madig-on an seguridad han nasud ngan waray namo-monitor nga ‘credible direct threat’ ha teritoryo han Pilipinas o ha mga mulupyo hine ha butnga hiton tension ha Middle East.
Ha usa nga opisyal nga pahayag han AFP, ginpahayag hine nga mahugot hira nga nakikipag-koordinar ha Department of National Defense (DND) ngan iba pa nga ahensya han pangobyernuhan agud nga bantayon ngan igmonitor an sitwasyon.
Ginabiso gihapon han militar an publiko nga magpapabilin nga kalmado, mag-obserba kontra ha disinformation, ngan tumapod la ha mga beripikado nga impormasyon tikang ha gobyerno.
Naka-andam na gihapon an AFP nga magpapadara hin pwersa para ha repatriation o pagpapa-uli ngan crisis response para ha mga Pilipino ha mga apektado nga lugar kun panaglitan igmando han gobyerno.
