Gin aprubahan na han Kamara ha ikaduha nga pagbasa an panukala nga balaod nga panuyo pahilawigon an bisa han Professional Regulation Commission (PRC) identification cards tikang ha presente nga tulo katuig tikadto ha lima katuig.
Pinaagi han voice voting, iginpasar an House Bill No. 8876 agud maibanan an gastos ngan pauru-utro nga proseso han renewal para ha milyones nga propesyunal nga Pilipino.
Sumala kan Leyte Rep. Ferdinand Martin G. Romualdez, usa ha mga author han panukala, importante nga mapagaan an pas-anon han mga magturutdo, nurse, engineer, architect, accountant, ngan iba pa nga propesyunal nga iginkokonsidera nga harigi han ekonomiya.
An nasabi nga pitad in kaparte han pag-iban han red tape agud himuon nga mas madagmit ngan mas makatawo an serbisyo han gobyerno.
Adi an lima nga importante nga probisyon han gin aprubahan nga panukala: Pahilawigon ha lima katuig an validity han ngatanan han Professional Identification Cards (PIC); manduhan an PRC Information and Communication Technology Service nga ig-upgrade an ira digital registration ha sulod han unom kabulan tikang ha pagpapatuman han balaod; ngan ibanan an halaba nga pila ngan ig-decongest an appointment system han PRC pinaagi han pag-iban han mga tinuig nga transaksyon.
