TACLOBAN CITY – Ada ha walo nga kabaybayunan ha rehiyon an ada ha ilarom han local red tide warning kun diin waray bisan usa hine nga mga baybayon an ada ha Shellfish Bulletin.
Sumala kan Christine Gresola, Information Officer hiton Bureau of Fisheries and Aquatic Resources Regional Office VIII, ha pinakabag-o nga advisory nga iginpagawas han ira buhatan in nahidugang an mga area han Calbayog City, Daram Island, Zumarraga Island, ngan Maqueda Bay nga nasakop han Jiabong, Motiong, Paranas, San Sebastian, Calbiga, Pinabacdao, ngan Hinabangan ha mga lugar nga ada ha ilarom han local red tide warning.
Samtang, nagpapabilin la gihapon ha kaparehas nga warning an mga areas han Cambatutay Bay ha Tarangnan, Samar, Irong-irong Bay ha Catbalogan City, Matarinao Bay ha Eastern Samar nga nasakop han General MacArthur, Quinapondan, Hernani, and Salcedo, ngan an kadagatan han Guiuan, Eastern Samar.
Subay ha resulta han laboratory exam nga gindumara han BFAR 8 – Provincial Marine Biotoxin Laboratory ha Catbalogan City, nagpositibo ha Pyrodinium Bahamense o usa nga toxic microorganism nga nagdudurot hin Paralytic Shellfish Poisoning an water sample nga ginkuha ha nasabi nga kadagatan ngan baybayon.
Igindidire la naman anay an panguha, pagdara, ngan pagkaon han ngatanan nga klase hin pangti-on ngan alamang tikang ha nasabi nga mga lugar.
Igintutugot naman an pagkunsumo han isda, nu-os, pasayan, ngan masag tikang ha nasabi nga kadagatan pero siguraduhon anay nga presko an mga ine ngan hugasan hin maupay ngan tanggalon an mga sulod han tiyan ngan hasang ugsa lutuon.
