Mahitungod ha pagkadismaya ha mahinay nga aksyon han kapulisan, usa nga misteryoso nga vigilante ha Mexico an nagdudumara hin kalugaringon nga hustisya. Gingagapos ha mga poste an mga kawatan han motor. Ha presente, maabot na ha lima ka-tawo an natad-an nga nakagapos ha poste.
Nagtikang an operasyon han gintatawag nga “Batman” dida han kabutngaan han Hunyo ha state han Jalisco, Mexico. An siyahan nga lalaki in natad-an nga nakagapos ha June 13 nga may nakasurat nga “kawatan” ha agtang hini. Usa nga gintutuohan nga ginkawat nga motorsiklo gihapon an nakit-an harani ha lugar. Kasunod hini, nadiskubre han mga pulis an upat nga iba pa nga indibidwal nga nakaeksperyensiya hin sugad nga pangapos.
Bisan man natuo an publiko nga an nasabi nga krusada in ginbuhat hin u-usa la katawo, ginpahayag han mga otoridad nga posible ini ginhimo han usa nga grupo han mga vigilante. Mapapansin gihapon an pagbaribad nga maghatag hin bisan ano nga pahayag an mga biktima.
Sumala kan Jalisco Secretary of Public Security Juan Pablo Hernandez, padayon an ira ginbubuhat nga imbestigasyon. Gintagan-duon niya ngan lima nga nakagapos in gintutudlok nira kumo biktima ha pagkayana, ngan ginpahimatngunan an publiko nga dire sumubad ngan magbuhat hin vigilante justice.
