TACLOBAN CITY – Padayon an ginbubuhat nga validation han Tacloban City Social Welfare and Development Office (CSWDO) ha listahan han mga benepisaryo han social pension program ha bug-os nga syudad.
Sumala kan Chona Bahin, head han CSWDO Tacloban, mahugot an ira ginbubuhat nga validation ngan revalidation han mga benepisaryo ha kada barangay agud nga magkaada hin clean list para han tuig 2021 han mga social pensioners nga angay makatagamtam han mao nga ayuda.
Ha pagkayana in waray pa impormasyon kun san-o liwat pagdudumaraon an masunod nga payout yana nga tuig ha mga social pensioners.
Nahibaruan nga pira ha mga ginbabasehan han DSWD ha pagpili han mga social pensioners adton mga nag-eedad 60 anyos paigbaw nga waray nakakarawat nga pension tikang ha GSIS, SSS ngan iba pa sugadman adton waray permanente nga source of income ngan waray regular nga suporta tikang ha pamilya o mga paryente hini.
